بعد الهدوء , اعادة ترتيب اوراق الاهلي , من يريد المناقشة بهد

بسم الله الرحمن الرحيم

إخوتي الأعزاء

لم أريد الكلام في مباراة الأهلي و النجم الساحلي إلا بد ان تهدأ عاصفة الغضب بداخلي و داخل معظم الجماهير الأهلوية بعد انتهاء المبارة لأننا بطبعنا شعب عاطفي دائما ما بتخذ قرارتنا في اوج انفعالاتنا سواء كان حزن أو غضب أو فرح و ده طبعا في منتهي الخطأ

و الحمد لله بعد ما هدينا و خرجنا معظم انفعالاتنا نقدر نتكلم بهدوء و حكمة و نقرر احنا عايزين ايه من النادي الاهلي في الفترة الجاية

و قبل ما أبدا الكلام بقول لجميع الاخوة الكرام : الموضوع ده للمناقشة بهدوء , أما اللي عايز يطلع غله و غضبه ففي مواضيع كتير في المنتدي يقدر يقول فيها اللي هو عايزه

إن شاء الله أنا هتكلم علي نقطتين : الأولي خاصة بالمبارة نفسها و الثانية خاصة بفريق النادي الاهلي في الفترة القادمة

النقطة الأولي :

بداية المبارة انتهت تماما و حسمت نتيجتها بفوز النجم و حصوله علي البطولة و ألف مبروك بروح رياضية

بمنتهب الأمانة الاهلي لعب مبارة جيدة حتي الدقيقة 61 وقت طرد عماد النحاس و بعدها اهتز اداء الفريق لفترة و ده امر طبيعي قبل ما تبدأ اللعيبة تستجمع تركيزها مرة أخري و تلعب بطريقة جيدة مرة أخري قبل أن ينفرط عقد الفريق تماما في نهاية المبارة

و بمنهي الامانة أيضا نقطة التحول الحقيقية في المبارة لم تكن في طرد عماد النحاس و إنما كانت في الدقيقة 53 في ضربة الجزاء الغير محتسبة لصالح محمد أبو تريكة لأنها كانت الدقيقة التي تأكد فيها لاعيبة النجم ان الحكم العرجون مش هيحتسب عليهم ضربات جزاء أبدا و ده مؤشر خطير هو اللي قلب المبارة تماما راسا علي عقب

المهم , أنا هتكلم علي كذا نقطة
1 - بالنسة للتشكيل في البداية , أعتقد ان مفيش داعي نقول ان جوزيه أخطأ في التشكيل و الكلام اللي ملوش أي لازمة ده دلوقتي , لأن أي حد كان يتوقع ان ده تشكيل الاهلي المثالي

2- أداء اللعيبة كان جيد , لكن الخطأ الاكبر و الفظيع اللي كانت لعيبة الاهلي بتعمله هو انهم بيسيبوا لعيبة النجم يباصوا الكورة و يستلموها بمنتهي الراحة علي عكس اللي كان لعيبة النجم بيعملوه مع الاهلي الضغط المستمر علشان يغلطوهم

3- أداء جوزيه : جوزية كان معذور لأن طرد عماد النحاس ضرب كل تفكيره لأنه بدل ما كان بيفكر في تطوير أداء الفريق الهجومي بقي بيفكر ازاي يقفل الشارع اللي ورا الاول خصوصا مع سرعة الشرميطي , لكن العيب الاكبر اللي عمله هو خروج بوجلبان اللي قدم أفضل مبارياته علي الاطلاق مع الاهلي منذ قدومه من سنة لأن خط الوسط بقي واقع تماما بعودة حسام عاشور لليبرو و ميل حسن مصطفي للناحية اليمين و ده اللي ادي النجم الافضلية , لكن احنا مش هنشنق الراجل علشان الماتش ده لأنها كانت مغامرة و فشلت بس هو ياما غامر و نجح قبل كده

4- أداء الحكم : و أعتقد ان ده هو لب المبارة تماما
عايز بس أفكر ان في الكام يوم قبل المبارة شنت الصحف التونسية هجوم ضاري علي العرجون و سردت ما سمته بالتارخ الاسود للعرجون مع الاندية التونسية , و واضح تماما ان الهجوم ده جاب نتيجة ممتازة علي العرجون
أداء العرجون و أخطائه المتعمدة أثرت تماما علي سير المبارة و نجحت في تغيير نتيجة المبارة و توجيه الكأس الي تونس بدلا من القاهرة
أخطاء العرجون كانت كالآتي :
** كان شايف صابر بن فرج و هو بيعمل الحركة الخارجة لأحمد السيد مرتين اتنين في الشوط الاول و الاعادة بينت تماما انه كان شايفهم و يستحق الانذار او علي اقل تقدير توجيه تحذير شفهي ده اذا كان رحيم جدا , و لم يعاقبه و الموضوع عدي كأنه مشافوش
** اعتداء واضح و صريح من اللاعب رقم 4 في النجم التونسي علي فلافيو بدون كورة يستوجب الطرد و اكتفي بالانذار
** ضربة جزاء واضحة وضوح الشمس لصالح أبو تريكة و تستوجب انذار للاعب النجم و لم يحستب شيئ و أشار باستمرار اللعب
** ضربة جزاء لأحمد شديد قناوي بعد تعرضه لدفع واضح امام عيون الحكم مباشرة و لم يحستب شيئ و أشار باستمرار اللعب
** عدم توفير الحماية للاعبي الاهلي من الخشونة المتعمدة من لاعبي النجم من بداية المبارة و التغاضي عن العديد من الانذارات - علي الاقل 4 انذارات للخشونة
** ترك لاعبي النجم الساحلي يضيعوا الوقت زي ماهما عايزين و حدث اكتر من مرة ان لاعيب من النجم يقع علي الارض دقيقة او اتنين و هو يروج يقومه بايديه و كأنه بيترجاه انه يقوم بدلا من انه يديله انذار

باختصار الحكم كان واخد قرار صريح انه مش هيحسب بلنتيات لصالح الاهلي او هيطرد لعيب من النجم ابدا و ان الاهلي لو عايز يفوز لازم يفوز علي الحكم اولا مش علي النجم

و ده درس لاعلامنا و لصحافتنا في كيفية ممارسة الضغط علي الحكام لدرجة الارهاب علشان يخافوا و يلعبوا لصالح فريق ضضد فريق و أدعو جميع وسائل الاعلام المصرية الي التعلم من التوانسة و ممارسة الضغوط دي علي الحكام علشان علي الاقل نضمن حقوقنا لو مش عايزين الحكم يلعب لصالحنا فمبيبقاش علينا

النقطة الثانية فيما يتعلق بمستقبل الفريق :

بسم الله الرحمن الرحيم " و عسي أن تكرهوا شيئا و هو خير لكم " صدق الله العظيم

أنا مش عايز الجمهور يزود في الحزن و كأننا خسرنا حرب 67 لأنها بطولة واحدة اللي خسرناها و لسه في بطولات لينا

و رب ضارة نافعة

و أنا رأيي ان الخسارة دي جات في وقت مناسب علشان نبدأ نصحح الاوضاع و الغلطات اللي باينه في الفريق من فترة لكن توالي المباريات في البطولات المختلفة من جهة و الانتصارات حتي الغير مقنعه منها اللي كان الفريق بيحققها من جهة تانية هي اللي كانت مخلية الناسي مخبية عينوها عليها او مش مديه فرصه للتصحيح

أولا : مانويل جوزيه

طبعا كلنا عارفين الكلام اللي هيطلع اليومين الجايين دول عن اقاله جوزيه المغرور و انه معدش عنده جديد يقدمه و الكلام الفاضي ده , لكن طبعا مانويل جوزيه يا جماعه مدير فني قدير جدا , ربما يكون أخطأ بعض الشيئ في المبارة لكنها بكل تاكيد كانت مبارة واحدة و مش هتمحي كل رصيد البطولات و الانجازات اللي عملها مع الفريق

يجب أن يبقي جوزيه مع الفريق لمدة موسم كمان علي الاقل غير الموسم اللي احنا فيه الا اذا كان هوة اللي عنده رغبة في الرحيل خصوصا بعد اللي حصل من الجمهور في الاستاد اثناء توزيع الميداليات و ان كنت اتمني ان راجل بخبرة و حكمة جوزيه و مدي علمه بحب جمهور النادي الاهلي ليه ميتأثرش بالموقف ده و ميديلوش اكتر من حجمه الحقيقي و هو نرفزة ملعب

ثانيا : اللاعبين

بالفعل هناك لاعيبة ادت دورها في الفترة اللي فاتت و لكن اصبحت عالة علي الفريق او علي الاقل لم تعد تصلح للعب مع الاهلي في الفترة القادمة و اللعيبة دي المفروض تتكرم من الادارة و تاخد التكريم اللازم من الجمهور لأنها اسعتنا علي مدار 4 سنين فاتوا م ش علشان بطولة خسرناها بظلم تحكيمي هنشتمهم , لكن هنشكرهم و نتمنلهم التوفيق في نادي تاني

** اللاعيبة اللي يجب الاستغناء عنهم **

1- عماد النحاس : حتي لو مش هيمشي علي الاقل يقعد احتياطي بعد المستوي المتدهور اللي بقي عليه حاليا و تقدمه في السن اللي مخلياه معدش قادر يجاري اللاعيبة الشباب في السرعه و لا القوة و يجب علي جوزيه يا اما اعطاء الفرصه للاعب الشاب محمد سمير اللي هو نفسه قال عليه انه مستقبل النادي في مركز الليبرو يا اما يدور علي لاعيب تاني و يتعاقد معه فورا في يناير
2- إسلام الشاطر : بطيئ بطيئ بطيئ و كبر فعلا و غالبا مش هيلعب تاني خصوصا مع استقدام احمد فتحي و وجود احمد صديق السريع المهاري
3- أحمد عادل : لاعب معندوش اي امكانيات كورة قدم اكتر من السرعه , يلعب الاعاب قوي احسن مش كورة و خصوصا في نادي بطولات زي الاهلي , علي مدار اكترر من سنه اخد فيها عشرات الفرص لم يقنع احد بمستواه و لا استطاع تطوير قدراته
4- أحمد شديد قناوي : كتر خيرك يا شديد بس فانلة الاهلي كبيرة عليه فعلا و صدقوني هيتباع هيتباع حتي لو قعد السنة دي كمان
5- طارق السعيد : أعتقد انه مش هيقدر يرجع لربع مستواه - السيئ أساسا - بعد الاصابة الطويلة و ان كنت شايف انه يتم الابقاء عليه لاخر الموسم في ظل ضعف شديد و عدم وضوح الرؤية بالنسبة لجلبرتو علشان موضوع الاصابات المتكررة
5- عبد الحميد حسن : ياااااااااااااااااه , انت فين يا ميدو , سوري بس انت مكانك مش الاهلي من الاساس , نستفيد بمكانك في القايمو بلاعيب تاني
6- عماد متعب : التجربة علمتنا ان اللعيب اللي عايز يمشي مستحيل هيلعب بالشكل المطلوب حتي لو كان في مستواه اساسا و متعب بقاله سنتين خارج الفورمة علشان هو قرفان و عايز يمشي , و افتكرو حسام غالي و محمد شوقي و واضح ان متعب تلميذ نجيب ليهم
8- أمير عبد الحميد : لو شايف ان سنه كبر و لازم يلعب دلوقتي يبقي يمشي أحسن دلوقتي بدل ما يثير القلاقل في الفريق خصوصا بعد ما كترت مشاكله في الفترة الاخيرة و يجل علي الادارة انها تفهم ان ده طلب مشروع من امير لانه عايز يلعب و هو مستحيل يقدر يقعد الحضري في ظل حالة التوهج اللي هو عايشها

** المراكز اللي المفروض نشتري لعيبة فيها **

1- حارس مرمي , تحسبا لرحيل امير عبد الحميد
2- ليبرو , لعيب يكون صغير في السن عايز يثبت نفسه و يبقي نجم , سريع , يجيد ضربات الراس و الألتحام , و حسن التوقع و قيادة الهجمات من الخلف , باختصار واحد زي عماد النحاس بس أيام الشباب
3- باك شمال
4- وسط مدافع : مفيش احسن من حسني عبد ربه
5- وسط مهاجم : غياب ابوتريكة بيترك فراغ رهيب بين الوسط و الهجوم
6- مهاجم : صغير سريع هداف قوي طويل لأن كل مهاجمين الاهلي قصيرين

** لعيبة لازم تاخد فرصتها دلوقتي **

1- محمد سمير : لعيب عجبني قوي و بيتهيالي عجب معظم الناس في ناتش الاسماعيلي في اخر الدوري اللي فات
2- أحمد صديق : ياخد ربع و لا عشر الفرص اللي خدها احمد عادل و يياثبت نفسه يا اما يقد احتياطي لاحمد فتحي
3- أسامة حسني : لعيب تاني محترم عايز الفريق يكسب ياخد فرصته انه يبقي اساسي

نقطة أخيرة بالنسبة للاعيبة و هي أرجو ان الادارة متفرطش في بوجلبان لأنه بدأ أخيرا ينسجم مع الفريق و بدات قراته الحقيقية تظهر اخيرا و اثبت انه لعيب كويس فعلا و يستاهل يلعب في الاهلي و بدا يعوض جزء من الفراغ اللي تركه محمد شوقي بعد الرحيل

ثالثا ً : الجمهور :

الجمهور عليه اكبر و اهم جزء دلوقتي لأن كل الحاقدين و الشامتين في الاهلي هيبداو الكلام دلوقتي و التقطيع هيشتغل و لازم علي الجمهور انه يقف مع الفرقة في الوقت اللي جاي علشان ناكد للكل اننا فعلا احسن و اعظم جمهور و يجل علي الجمهور انه مينساش ان اللعيبة دي هي اللي جابت لينا بطولات عديدة في ال 4 سنين اللي فاتوا و متنسوش ان عندنا ماتش مهم جدا في الدوري مع بتروجيت يوم 25 و الحمد لله انها فترة كفيلة بغسل احزان الجمهور علشان يرجع يملي المدرجات و يقف مع الفريق للخروج من الكبوة الحالية

رابعا : الادارة :

يجب علي ادارة الاهلي انها تتقدم باحتجاج رسمي و عاجل علي حكم المبارة العرجون , أنا عارفة ان ده مش هيغير من نتيجة المبارة , لكن علي الاقل نتعلم من التوانسة اللي منعوا رفع انذار بركات لأنهم اتقدموا باحتجاجات مماثلة علشان الانذارات تتشال من اللعيبة الموقوفة من عندهم و يجب علي الادارة ان تتعلم الدرس في كيفية ممارسة الضغوط علي الاتحاد الفريقي علشان العملية متبقاس سبهللة و حقنا يتهضم كل مرة

كلمة أخيرة يا جماعه
كلنا هنتحاسب علي الكلام اللي بنقوله يوم القيامة , فأرجو ان الكل يراعي ربنا في كلامه

أرجو من الجميع المشاركة بفاعلية

و أنا أسفة لو كنت طولت عليكم
__________________


( لا إله لا اله إلا الله )
( اللهم لك الحمد كما ينبغي لجلال وجهك وعظيم سلطانك )
( سبحان الله وبحمده سبحان الله العظيم )
( لا إله إلا الله وحده لا شريك له ، له الملك وله الحمد وهو على كل شيء قدير )
( سبحان الله و الحمد لله و لا اله إلا الله و الله أكبر )
( اللهم صلي على سيدنا محمد وعلى اله وصحبه وسلم تسليما ًكثيرا )
( سبحان الله وبحمده عدد خلقه ورضا نفسه وزنة عرشه ومداد

والله عندك حق كلامك كله صح وشكرا ليكى

( لا إله لا اله إلا الله )
( اللهم لك الحمد كما ينبغي لجلال وجهك وعظيم سلطانك )
( سبحان الله وبحمده سبحان الله العظيم )
( لا إله إلا الله وحده لا شريك له ، له الملك وله الحمد وهو على كل شيء قدير )
( سبحان الله و الحمد لله و لا اله إلا الله و الله أكبر )
( اللهم صلي على سيدنا محمد وعلى اله وصحبه وسلم تسليما ًكثيرا )
( سبحان الله وبحمده عدد خلقه ورضا نفسه وزنة عرشه ومداد
ريم الاهلوية

اى خدمة بس دة الصح مشكور على مرورك

صح بس الاهلى حديد برضة وهايعدى اى ازمة او محنة موفقة

اووووة زمالكاوااااااااي

يا عمدة عيب عليك يا زملكاوى خلى حد غيركوا يتكلم هههههههههههههههههههههههههههههه